逆旅遊蹤
2005年11月19日天氣：多雲間中有太陽，微風帶點涼意—適合戶外活動o既天氣
四人隊伍：米高隊長、隊員豪哥、女隊員Eva及隊員西門子
未出發先興奮
沙田火車站—突破青年村
心情：興奮、愉快、緊張
狀態：4 (1最低、5最高)
概況：我哋四人一早係沙田火車站集合，食個豐富早餐後，出發往突破青年村。
突發事件：隊員豪哥o既背包，懷疑因過度興奮，出現「失禁」現象，不斷滴水。經調查過後，發現原來係因豪哥o既水袋未扭實！
正式起步
突破青年村—B1 沙田單車公園
心情：緊張、有點擔心
狀態：3 (1最低、5最高)
概況：沿著突破青年村往沙田單車公園，先有一段大斜路下山，開始感得膝頭大脾肌肉有點拉力，要小心行！
突發事件：行到分岔路，被一個行C路線o既人「老點」(佢哋只行8小時，同埋唔洗踏單車)，害我哋行咗一小段冤枉路！
城市單車
B1 沙田單車公園—B2 沙田單車公園
心情：愉快
狀態：3 (1最低、5最高)
概況：終於行到單車公園，亦開始我哋o既單車旅程—繞城門河一周。
突發事件：去到中途，我架「戰車」竟然脫鏈，害到米高隊長同隊員豪哥要掉頭拯救修理；另外，隊員豪哥亦慘被公司「追魂Call」襲擊，因而拖慢進度！
手腳並用
B2 沙田單車公園—B3 攀石澗
心情：愉快
狀態：3 (1最低、5最高)
概況：終於返到單車公園，經一輪整裝後，再出發。攀石澗唔算好困難，不過好多地方，都要手腳並用，再加身體平衡，才可通過。要多謝米高隊長為我哋預備特製手套，我哋才能化身成spiderman！
突發事件：開始攀石澗冇耐，我就o黎個「有隻雀仔跌落水…」，下半身濕透，幸好那些電子產品如電話、相機，沒有濕壞！
上行「老揪」
B3 攀石澗—B4—B5 馬鞍山村小巴站
心情：辛苦…
狀態：2 (1最低、5最高)
概況：攀完石澗，食過午餐，稍稍休息，換過行山裝備後，就開始上山。d山路又急又斜，行得又慢又辛苦，全靠有枝行山杖，先好dd…
突發事件：行到中途，我對大脾開始「投訴」，自己拉咗陣筋，又按摩一吓大腿肌肉，好似好咗d，前面B5站，大會會有人治療，撐多陣啦…
投訴：幾經艱辛，終於來到B5，大會係到設有「創傷諮詢及治療服務」，當席o既唔知係紅十字會定係St. John。我走埋去話佢知我揪筋，點知佢愛理不理咁話「哩d都係正常o既」，跟住就咁叫我自己拉行筋、坐陣休息吓就算，咁「好服務」邊到搵！？
「老揪」加劇
B5 馬鞍山村小巴站—B6
心情：好辛苦…行咗一半都冇，之後點算？？
狀態：2 (1最低、5最高)
概況：係B5休息咗陣之後，再繼續行，又係上山，唔知我仲撐得幾耐？況且我哋已經比預定時間慢咗一個鐘，要追返都唔係咁易！
突發事件：行咗陣，我對大脾又開始「投訴」，好痛！幸有隊員豪哥和米高隊長先後為我按摩，情況才有抒緩。我懷疑米高隊長有兼職做按摩，好pro，但好痛！好好笑！係米高隊長幫我「治療」時，碰巧係身旁有另一隊人馬，其中一個隊員都發生同樣o既狀況，結果我地兩個都不約而同地係山中嘶叫(「治療」過程真係好痛！)
回光返照？為啖氣？
B6 — B7
心情：鬥志突然轉旺！
狀態：4.5 (1最低、5最高)
概況：由B6去B7係其中一段好長o既路段，而且仲有好多上斜路！不過經米高隊長o既「物理治療」後，對腳真係唔痛！好！上呀！
投訴：點解條斜路，好似行極都行唔完！？豈有此理！！
自我獎勵：到達B7，獎自己半條香腸！Yummy！
衝呀衝！快搶攻！
B7 — B8 水浪渦
心情：鬥志更旺！支援隊帶來o既美食，你要等我呀！
狀態：5 (1最低、5最高)
概況：我o既鬥志越來越強，可能對腳行順咗，又可能我哋o既盼望(晚餐)就係前面，所以腳步開始加快。原本係隊中，我一直留守係最後o既位置(唔係策略問題，而係自己體力、實力o既緣故)，現在竟然帶先。唔單止咁，我哋仲見人過人、見隊過隊。再者又係下山路段，我哋簡直半步落山！
嘆世界
B8 水浪渦
心情：好開心，又好感動
狀態：5 (1最低、5最高)
概況：終於去到B8 水浪渦，標誌住我哋已完成旅途o既一半！我哋o既支援隊伍(包括：西門太、米高太、車手偉文與及行山怪傑—老鬼昌)已經係到守候咗好耐。見到西門太，我忍唔住錫咗啖！佢哋預備咗好多嘢食，例如玉米碎肉羹、茄汁鏍絲粉、精製熱燒賣、魚丸雜菜煲、仲有合時水果和應時飲料！
我哋十足十大爺咁樣，想食d咩，開聲就有。唔單止咁，佢哋仲幫我哋做腿部按摩，車手偉文幫我按，佢好好手勢，仲好好力水，我又再次嘶叫！嚇到在場o既工作人員問我哋發生咩事，需唔需要幫手！
值得一讚：大會在此站，設有「物理治療服務」，雖然車手偉文o既按摩，已經非常好，不過大會既然已經預備咗，唔幫襯吓，好似浪費咗佢哋o既心意。幫我按摩果位女物理治療師，手勢一流！爽！
星夜旅程
B8 水浪渦 — B9
心情：鬥志去到頂點！
狀態：5 (1最低、5最高)
概況：經過一輪休息後，我哋又起行！因天色已黑暗，涼風陣陣，我們加了點衣服，又亮了頭燈！車手偉文(要提一提，佢當晚係要去飲宴，咁趕都幫我哋手，真係要多謝佢！)幫手送兩位太太回家，而老鬼昌(再提一提，佢朝早係要返工，放咗工仲同我哋顛，都唔知點多謝佢！)就化身成「伴讀書童」，陪伴我哋繼續上路！ 可能經過休息，體力再次補充，我哋o既身體同心靈指數都達到極高水平。因此我哋o既步伐都加快咗，再o黎見人過人、見隊過隊。
惡夢開始
B9 — B10 茅平
心情：急轉直下…越行越辛苦…
狀態：1.5 (1最低、5最高)
概況：由B9去B10，先係落山段，去到一堆西班牙別墅後，就屈上山，進入其中一段麥理浩徑，行數不盡o既樓梯級。可能之前衝得太急，再加上條路又急又斜，我個孿筋又開始唔聽話，邊行邊痛，惟有行一段仔，就拉吓筋，休息一陣再行。
值得一讚：好辛苦咁撐到去B10 茅平，聽到有「物理治療服務」提供，唔理三七廿一去咗排隊先。每次俾人按摩，我都好開心，因為真係好舒服，佢哋唔單止手勢好，仲會講一d鼓勵說話同我哋加油！
突發事件：係物理治療師幫我按摩o既時候，米高隊長帶咗個壞消息俾我，話因為我哋當時o既進度已慢咗兩小時，所以原定安排係B12出現o既支援隊伍，因安全理由(佢得一個女仔，係隊員Eva o既朋友)，將會取消。換句話說，我哋要靠身上剩餘o既食物，支持我哋餘下o既路程！(我哋係B8仲卸下咗部份飲食，以減輕負重！？)~~好down呀！！
胡思亂想
B10 茅平— B11
心情：情緒低落…好想放棄！
狀態：1 (1最低、5最高)
概況：係B10經過腳部治療後，情況略為改善，不過都撐唔得幾耐！因為腳傷o既緣故，我行得好慢，往往係後邊一個人行。哩個時候思想係到交戰，好多負面o既思想不繼襲擊我，一時叫我放棄，一時又話我d隊友都放棄我、唔理我！哩個時候惟有祈禱，不過互有勝負！
開心事件：係中間小休o既時係，老鬼昌竟然問我哋要唔要飲熱美綠？緊住佢就係個背包到攞個露營用o既gas爐出來，然後係到煲水、沖美綠！試想想，係山野中，寒風吹襲下，有咩嘢比一小杯熱美綠更好？
值得一讚：好辛苦咁撐到去B11，係一個好簡陋o既check point，不過工作人員好好呀！佢俾咗杯熱水我飲，又幫我按摩對腳，好多謝佢哋！
雪中送炭
B11 — B12 花心坑
心情：情緒仍然低落…仍然好想放棄！
狀態：1 (1最低、5最高)
概況：對腳o既情況越來越差，基本上我右腳已經差不多去到極限。行平路都尚可，一旦上斜落斜，就要我條命，惟有行得更慢，同埋靠多點左腳發力！
開心事件：係途中收到消息，我哋雖然唔會係B12見到支援隊，但佢會將飲料同一些乾糧，寄存係B12 o既工作人員！Yeah！
值得一讚：又係好辛苦咁撐到去B12 花心坑，果到都有「物理治療服務」提供，咩都唔理啦，第一時間去排隊。唔知係咪嚴重咗，今次佢哋先用冰敷，再有兩個人幫我按摩！舒服咗好多！
雪中送炭：老鬼昌真係好，佢將我哋帶去o既即食紅豆沙加熱，係哩個時候，有一啖熱紅豆沙到肚，此時此刻，感受難以形容！再說，原本佢諗住陪我哋行到B12 花心坑，跟住返屋企，宜家佢竟然改變主意，繼續陪我哋，直到終點！(老鬼昌，唔係，應該叫昌哥﹐非常非常非常非常多謝你！)
最大極限？最後挑戰？
B12 花心坑— B13女婆山
心情：叫天不應、叫地不聞
狀態：0 (1最低、5最高) 原來低處未算低
概況：經過係B12腳部治療後，情況係冇大改善，右腳已經冇力，其實唔單止隻腳，其實其他部份都接近極限。上女婆山，唔單止斜，而且需要手腳並用，我諗叫行山唔夠貼切，應該叫爬山比較o岩d！去到山頂，真係命都冇！
多謝：米高隊長久不久就搵電筒照一照條路，話俾我知應該行邊條路！
終點在望？寸步難行？
B13女婆山— 突破青年村
心情：雖然終點在望，不過心情沒有因此而得到振奮，心裡仍有很多很多負面情緒，不斷係到問點解：點解要咁辛苦？點解行極都未到？點解大會要設計一條咁難行o既路線？點解？點解？點解…
狀態：x (1最低、5最高) 低到估唔到！
概況：由女婆山到突破青年村係落山路段，條路好斜，而且係鬆散o既沙石地，平時行都唔容易，更何況係上山時已用埋剩餘o既體力，隻右腳又軟弱無力加用力會痛，真係寸步難行！在多處地方，我係坐係地下，一隻手捉實d樹枝，慢慢咁滑下去。
特別鳴謝：隊員豪哥，係哩段路一直係我身邊陪住我，不斷提醒我要小心，又不斷鼓勵我繼續行！又多謝米高隊長，佢行係我前面，一方面探路，又一方面提場！我可以捱到返終點，真係靠佢哋支持！
成了
突破青年村
心情：難而形容！好似辛苦o左一整日，就係等哩刻！
概況：去到突破青年村，我不禁大喊：「我哋終於到啦！」我哋四個隊員加埋老鬼昌，一齊打響個鑼，代表我哋o既逆境之旅，終於畫上句號！我哋總共用o左差不多19小時完成整個旅程，雖然比大會預定o既16小時，慢了近3個鐘！不過對於我哋來講，時間唔係最重要，最重要o既係我哋可以堅持到底，直到完成為止！
如果現在有人問我，下次仲參唔參加，我個答案就好似有人問一個剛生完BBo既太太，仲會唔會再生o既答案一樣！
posted by 西門子 @ Monday, November 21, 2005
<< Home