傷膝青年
以下是「傷膝」事件薄：「傷膝」之引發
21/10 (五)
0900
上咗內地睇廠，行行重行行咗一日。
1830
同西門太拍拖行街
2300
晚上覺左膝隱隱作痛，不過太倦，唔理，瞓覺！
「傷膝」之爆發
22/10 (六)
0900
起身~
....好似有d唔妥？
點解左膝仲係痛，仲好似有d腫，而且隻左腳伸唔直????
打電話俾牧師，話佢知果朝o既約會，相信要取消！
牧師仲推介咗間相熟o既跌打鋪俾我，據講哩間跌打鋪有係中神o既診所list到出現。
1215
動身~
oo~~身上一個仙都冇，西門太又出咗街，所以要先出街攞錢，再打的睇跌打。
去到跌打鋪樓下，
看更：「係咪睇醫生呀？」
西門子：「做咩咁了事如神？」(唔通佢兼職做埋門診登記？)
看更：「見你咁行路法都知啦！」
西門子：「係膝頭痛呀！」(果然觀察入微，哩座大廈保安唔錯！)
看更：「哎吔！咁後生…」
西門子：「……」
去到跌打鋪，
見到「基督是我家的主」，哦！唔怪得係中神o既診所list到出現！
特別在此鳴謝教會幹事何姑娘o既幫助，佢預先親身幫我攞咗籌，如果唔咪，唔知要等幾耐，我先有得睇！
醫師診斷我係膝頭o既筋骨勞損。
醫師：「你最近係咪成日企或者成日坐？」
(吓，唔係企就係坐o架啦？呀仲有…)
西門子：「我最近成日行！」
醫師：「哦！咁你哩排唔好行咁多啦！仲有，行路唔好咁急，特別係轉彎o既時候！…」(又係喎！我平時真係咁行路法！特別係朝早返工、追巴士o既時候)
醫師：「…仲有唔好追巴士！」(知我心諗咩喎？)
醫師：「…仲有你…要控制一吓體重！」 (oo…點重死穴？)
西門子：「咁我適合做d咩運動呢？」
醫師：「…游水啦！游水最好o架啦！游自由式同背泳最好！」 (吓！我唔識哩兩款喎！蛙式得唔得呀？)
醫師：「…蛙式就唔好啦！」(又知我心諗咩？)
西門子：「咁除此之外，仲有咩運動適合我做呢？」
醫師：「……都係游水啦！游水最好o架啦！」
西門子：「……」
「傷膝」之檢討
的確最近我係行得比較多﹐主要都係為咗11月果活動做準備，不過或者我操之過急，所以…
再加上冇點注意自己行路、坐等等o既姿勢，所以…
一句講晒：「仲至以後小心d」
「傷膝」之後記
前日行街時，經過藥房，竟然留意治療關節o既藥物廣告，不其然又鈎起看更o既說話：「哎吔！咁後生！」
posted by 西門子 @ Thursday, October 27, 2005
<< Home