胃口奔馳
有一日，西門胃怒氣沖沖咁找西門口誨氣。由於西門胃週身胃酸，所以攪到整個喉嚨都充斥住濃烈o既酸味！西門胃對西門口怒吼道：「喟！你點做嘢o架！你可唔可以俾d責任感o黎睇吓？d飯餸你咬兩咬就收工，然後一聲就吞落肚。你睇！根本都未o趙碎，害我不斷加班！你想點呀？」 西門胃帶咗d啱啱「接收」o既飯餸俾西門口睇。
西門口委屈地回答：「西門胃先生，害你成日加班，真係唔好意思！不過，我都唔想o架，我都係接咗西門子order做事！實不相瞞，我都係受害者！都唔知點解，西門子食親嘢，都好似滾水淥腳，成日都將d嘢食三扒兩撥咁塞晒落我到。你可能唔知？我都忙到咬牙切齒，我已經博晒老命咁o趙，但係實在太急，我都做唔切！我時不時都咬親自己，你睇吓我個嘴唇，又睇吓我條脷，傷晒啦！都唔知有冇得claim工傷？」西門口又向西門胃「展示」佢d傷痕！
西門胃同西門口彼此惺惺相惜，繼續訴說自己不幸o既遭遇！最後，佢哋約定，如果工作環境再得唔到合理o既改善的話，佢哋會聯同其他有關部門，一齊發起工業行動，到時睇吓西門子知唔知驚？
以上故事純屬虛構，如有雷同實屬不幸
posted by 西門子 @ Tuesday, October 25, 2005
<< Home