結婚生活
近哩一兩個月，我o既生活都好像圍繞「攪結婚」同埋「去結婚」！唔好誤會！雖然我「今日」係「冇結婚」，但原因只有一個，因為我已經結咗婚！有個美麗、聰明、賢淑、…(下刪千言萬語)…o既西門太！
「攪結婚」
最近我同西門太充當某某團友o既婚禮統籌。
由佢哋開始籌備婚禮作佢哋o既參謀，到結婚當日作佢哋計劃o既執行者；又由當天早上接新娘開始，到當天晚上酒樓「找數」結束，我哋一直陪住佢哋，感覺就好似我同西門太結多次婚咁！雖然係辛苦、係累透，但係又覺得好有意義。回想當日，我同西門太結婚o既時候，身邊亦都係有好多親戚好友，願意為我哋赴湯蹈火，死而後已(...一時誇張咗d，佢哋宜家都健在，仲生活得很好！)。現在係某某團友身上所作，就好似係報答一樣，希望佢哋將來亦都能有此體會，又報答係其他人身上！
「去結婚」
出席好友們o既婚宴，係一件樂事，亦都係一種榮幸，的確值得我為佢哋返工行路、三餐捱麵包！
樂事—係能藉此機會，見返一d好耐冇見o既朋友，聚一聚、update... update...
樂事—係有機會見到新郎新娘o既出位表現。好似最近我見有位新郎好友，當著眾親友賓客面前，大唱自創情歌，雖然佢有著一副多元化o既「世界key」歌喉，同有時走音走到嚇壞人，但哩d都只會顯出佢對妻子o既勇氣同坦誠！大讚！
榮幸—係當播放新人VCD，展示他倆成長各個階段o既照片時，發現自己亦在相片中！自己好似突然化身成活o既「時間囊」一樣！
榮幸—係當見到uncle、auntie(新人o既父母)時，雖然好耐無見，但係佢哋仍認得自己，又叫得出名字！(儘管佢哋可能會補充句：西門子…你好似大咗幾個碼…)
posted by 西門子 @ Monday, October 31, 2005
<< Home