為誰工作？為誰活？
最近係團契，同d團友仔思想一個問題，就是讀書同信仰o既關係，帶出「信仰不是生活的部份，而是生活完全的根基/基礎」但係一個好實際o既問題—「點解要讀書呢？」「剛巧」自己最近都思想緊類似o既問題—「點解要工作呢？」
人一生頭果廿年主要係讀書，緊住果四十年(如果冇失業的話)就主要係工作！工作佔咁大部份，唔知大家有冇想過點解呢？如果係基督徒，諗法會唔會有d唔同？
又「剛巧」身邊有d基督徒，最近都係工作上有唔同o既遭遇同諗法：
弟兄D (Training Manager)
「最近我教會牧者話俾個工作o既"offer"我，佢叫我quit咗宜家份工，去教會幫佢手，與此同時佢會train我，有朝一日我可以幫助教會o既發展。佢又問我，如果我得兩年命，我會點安排先會今生無悔？我都有同父親(都係牧師)商量過，佢都認為哩個係難得o既機會！我諗我都會quit宜家份工！」
弟兄H (中學教師)
「我覺得上帝呼召我，要我係工作o既地方，影響我老細(校長)，以至完成上帝o既工作。而的確最近我得到校長o既信任，我亦有好多同佢合作o既機會，雖然係好辛苦，係好忙碌，但係我覺得都係值得，因為正正朝哩個方向進發！」
姊妹W (傳道人)
「我係哩間教會服侍咗幾年，初初覺得間教會發展得好好，自己服侍o既事工又好有果效，牧師好信任我，從不過問我手上o既工作。不過最近我覺得好孤單，同工們好似各自為政咁，究竟發生咗咩問題呢？我試過同牧師反映，但最後好似不了了之…」
姊妹P (中學教師)
「我最近突然收到上帝o既call，要我放下手上o既工作，進到神學院，接受全時間裝備。我其實未係好肯定，又驚第日會後悔，所以o黎緊會入去獻身營再睇睇！家人大都表示支持，只係其中一個家姐(未信)問我，個神學院學位係咪國際認可…」
弟兄T (工程師)
「我對我o既工作前途仍然有要求，係哩到做嘢，冇錯，工作量唔算多，待遇仲比其他人好，但係我睇唔到係哩到做嘢有咩前景，我亦都係工作上得唔到滿足！有人話『工作平穩又唔需要點長時間工作，咁咪可以多d時間事奉神，係教會服侍囉！』我唔同意！如果係要咁，我做咩唔做傳道人，咁咪仲可以全時間事奉…」
姊妹C (設計 出版)
「最近我係公司被逼迫，老細要我幫手做果d命相書，以前我係堅持唔做，但係因為公司希望係哩類書到擴大發展，將會多出版哩d書，所以係分配工作時，唔多唔少都會分到！宜家都唔知點算？繼續堅持唔做咩？好似對同事唔公平，你個人立場大晒咩？如果應承做？有好似對唔住上帝！唔通要我辭職唔做先可以攪惦…」
弟兄S (工程師)
「我知道上帝攞我係哩到，係有佢o既心意，但係我唔係好知囉！若問我對哩個行業o既睇法，有冇前途咁？我真係唔係好知，宜家好似見步行步咁，衰d講，做一日和尚，打一日鐘咁！究竟工作有咩意義？我好想知！我唔想不明不白咁消耗我o既時間！」
大家又點睇？你o既生活過成點，係咪好有意義？你清楚自己為誰工作、為誰活未？
posted by 西門子 @ Thursday, October 20, 2005
<< Home