逆旅先鋒—重新評估篇
今晚出席了逆旅先鋒(Inner Challenge)o既簡介及體能測試會。主持再次簡介該歷奇活動o既路線、注意事項等。
之前報名時諗住個活動好簡單，自己應該可以應付到，不過當主持介紹條路線時，我個心就好像以色列民第一次窺探迦南地咁—「消化」了！嘩！整段路程足足有40km，唔係平路，而係崎嶇不平o既山路！對於我哩個唔行慣長途o既參加者，大家真係要好好為我禱告！
之後，參加體能測試。
呆了！我哋隊長之前話個體能測試好簡單(佢之前參加過)，都係上吓樓梯、落吓樓梯，又度下心跳咁，唔洗擔心！但係…今年個測試叫"Yo-Yo Test"，好似係測試身體o既帶氧量。唔好睇個測試名好似咁「平易近人」，紀律部隊係招募人手時，都係用佢o黎「篩選」參加者，可想而知佢有幾「激」！
經過哩個幾乎「要咗我條命」o既體能測試後，我o既體能被評為「平均以下」！oh！我真係要重新評估吓哩個活動o既難度，同埋o黎緊o既訓練安排先得！
個簡介及體能測試會攪到晚上十點幾先完，我哋又未食晚飯，所以都好肚餓！於是，嗱嗱淋搵間茶餐廳醫肚。當個個人都只係叫咗碗粉麵時，我好不客氣地叫咗碟焗豬扒飯！(oh!無藥可救！)
似乎除咗要克服逆旅先鋒o既種種困難之外，當務之急係要培養我o既自制能力！
posted by 西門子 @ Saturday, October 08, 2005
<< Home