米奇白老鼠
雖然香港迪士尼樂園要到下星期一先正式開放，不過託家妹之福，我同西門太可以率先進場，又承蒙迪士尼之「邀請」，我倆有幸成為樂園總彩排日o既嘉賓—米奇白老鼠。
早上我倆在麥記作進場前o既最後準備—食早餐，我對坐在身旁o既西門太說：「我實在告訴你，今日你要同我在樂園裡了。」去到樂園，看見人山人海，我倆當然唔係唯一o既白老鼠啦，突然心裡有種係維園行花市o既感覺！
樂園現時分咗四個區域，分別為：美國小鎮大街、探險世界、幻想世界、明日世界。地方雖然唔算好大，不過我哋最後都未行晒所有地方 ，原因可能係好多地方都要排長龍，又或者我哋自己未係好好咁善用時間。
令我較難忘o既相信係樂園內各項o既表演(Golden Mickey 一定要睇)、花車巡遊、同埋晚上o既煙花匯演。至於場館內o既機動遊戲就…
------------------------------------
離開時，我接受特派記者西門太o既訪問—
西門太：經過今次o既遊覽後，你仲會唔會再o黎？
西門子：我估我短期內，都唔會花錢再來，我估起碼等佢再擴建多幾期先啦
！
西門太：咁如果有d同你年紀相約o既朋友，你會介紹佢哋嚟嗎？
西門子：我估我會介紹佢哋去海洋公園，因為有多d刺激好玩o既機動遊戲！
西門太：咁如果係d同大過你o既長者呢？
西門子：咁我會介紹佢哋去香港公園，有動物睇，又有雀仔睇，環境又清靜！
西門太：哦…咁…咁如果係d小朋友呢？
西門子：帶佢哋去冒險樂園，可能仲開心！…你問咗我咁耐，都係時候輪到我問。如果宜家只係俾你去一處地方，你會揀邊到？
西門太：唔…我想搵處地方，可以舒舒服服咁食餐飯、鋸下扒咁啦！
西門子：哦！你即係話想去燒烤樂園！
(以上嘉賓意見，不完全代表本台立場！)
posted by 西門子 @ Thursday, September 08, 2005
<< Home