飄移
昨天同兩個團友仔睇咗「頭文字D」(InitialD)。套戲唔講得上非常好睇，不過勝在節奏明快，同埋好多攪笑對白。「好簡單o既o者，即係飄移咁，點飄呀？一入彎，拉一拉手掣，架車「BEL－BEL」咁啦，咁又點呀，型囉！」
「飲奶好呀,有咩好呀又高鈣,又有蛋白質，最緊要係咩呀?明目呀ma！車手最緊要係咩呀?對眼 」
除咗笑位外，都有一兩句語重心長，例如：每個人都有一個屬於佢o既世界…
睇完戲，娘子join埋我哋食飯，再跟住一齊返團契。今次週會係戶外週，去傳道人屋企。臨出發前，成班團友仔去咗東涌一個「超級廣場」買嘢(無錯係廣場唔係市場，因為真係超大)。買完嘢，就攞住一袋二袋咁，準備搭車去傳道人屋企。
行吓行吓，好似有d嘢唔對路…去到巴士站準備上車時，幣！點解唔見咗娘子o既？唔通佢學識「飄移」？行行吓，唔見咗！跟住梗係立刻返轉頭搵啦！大家可能唔知？留底老婆唔理，自己走咗去，知唔知係咩呀？…係大罪！
oh！冇囉！起咗火囉！大家唔使理我o架啦，繼續玩得開心d啦！我唔去得啦，因為趕住返去救火…
~~~~~~~~~~~~~~~~~~~~~~~~~~
今朝崇拜後，我俾班團友仔圍住，佢哋好緊張我呀，又關心我、又慰問我！
大家放心吧！我冇事呀！希望冇嚇親大家啦！同埋我感受到大家對我o既愛護呀！多謝晒！
posted by 西門子 @ Sunday, July 10, 2005
<< Home