西門町 in Bloggerland: July 2005

友得Camp

今年高中團o既生活營—友得Camp (29-30/7)，終於完滿結束。

今次營會與往年的有些不同，首先是由三日兩夜轉為兩日一夜；另外，活動內容也有得大的分別，今年活動以集體遊戲為主！幾好呀！可以等d團友仔玩熟d！

不過，我估佢哋都幾辛苦，試諗下：三十幾度高温(再加上幾陣o既失暈雨)，係冇遮冇擋o既環境下，肩並肩，大汗搭細汗咁玩集體遊戲！哈哈！幸好我唔洗落場，否則我一係中暑，一係就成身散晒！大家明白啦！我年紀唔細啦嗎！

以前同佢哋去宿營，我都會盡量爭取時間休息，早d瞓。不過今個camp可以輕鬆d，夜晚仲繼續同佢哋玩到不亦樂乎，玩下啤牌，又玩下UNO。同佢哋玩games都可以睇到d嘢，好似千姐唔會點諗嘢、相反阿濠就好深思熟慮、KK就好睇住佢GF…唔知係咪咁以前d人話，外母睇女婿，總會同佢打幾鋪麻雀？玩下玩下，咁就凌晨五點！

第二朝出camp都有段小插曲。話說我係其中一個幫手影數碼相，係camp裏面我都影咗幾多相，係回程o既旅遊巴上，我想睇返d相時，「幣！點解read唔到o既？」相機螢幕顯示「memory card受損！」慘啦！唔通哩兩日果d相，將會化為烏有？哩個時候，我哋o既攝影高手—Patrick，就走過o黎，想借相睇，咁我就借俾佢，睇佢攪唔攪惦？佢竟然諗到試用另一部機去讀相！wow！得呀！d相冇唔見到！(咁…即係我部相機壞咗！幣！) Yeah！總算d相冇事！多謝主耶穌安排哩個小天使俾我！

*********
後記：
我真係老啦！星期六出camp，星期日個人都係浮吓浮吓，咁都係正常呀！但係我竟然去到星期一都未灰復完…星期一我係要返工o架，夠鐘起身時，我同老婆大人講：「不如我請多一日假呀？」哈哈就係咁，我有個long long weekend！

西遊記之布曼雙城遊—完結篇

一連七天o既布曼雙城遊終於完結。

同朋友仔一齊去旅行，其實好容易有衝突，如果鬧大咗，除時連朋友都冇得做！

不過我哋哩班「四人幫」都ok和氣，大家都係d冇咩所謂o既人，我就更加係啦，你話去邊，咪去邊囉，仲好，我唔洗點諗要去邊，真係有「自由行」o既彈性，加埋「跟團」o既領隊服務(不過唔洗俾導遊費！)

再者，我哋哩個組合，已經唔係第一次。我哋幾年前，一齊去過台灣，果時我哋都未結婚，兩pair情侶，分房瞓(我就梗係同呀譚生一齊啦！)

我打趣咁同團友仔講，唔知下次我哋再一齊去旅行時，唔知會唔會拖男帶女去呢？

西遊記之布曼雙城遊—「我杯茶」篇

前文提過「行咇」絕不是my cup of tea，咁究竟咩先係呢？

去親旅行，無論係跟團定係自由行，都一定有好多idling time，無論係等待o既時間、定係交通o既時間，哩d時間動輒以小時計，冇遊戲機係身，瞓覺又瞓唔到咁耐。時間流流長，點kill time?我就選擇睇書，特別係果d平時無時間去睇，又無勇氣去揭開果d「字典」書！

今次旅行，我就帶埋睇剩三份一，Dan Brown o既 Da Vinci Code，同埋一到完全未開封，Rowling o既 Harry Potter。唔好誤會，唔係最新果集Half-Blood Prince，係上一集The Order of Phoenix先啱，試想想，成七百幾頁書，對於平日o既我，那有閒情逸緻同埋勇氣去「開卷」！

哩個行程收穫唔錯，睇完Da Vinci Code(其實佢好似我中學時代睇"衛斯理"咁，知不過哩本係外國版)，同埋四份一多少少o既Harry Potter！開咗個頭應該會好d，就算返到香港都有多d動力去睇埋佢，況且阿Half-Blood Prince仲係到排緊隊！

正所謂：「讀萬卷書不如行萬里路」，宜家我將兩者合而為一，豈不更雙得益彰！

再望望書架，至少仲有兩本「字典」書係到輪候中，一本係Lord of the Rings，另一本係The Chronicles of Narnia，佢哋o既「內涵」真係令我望而生畏，我唯有帶著敬意咁對佢哋講：「好快輪到你哋o架啦！你哋安心咁係到休息一下先啦！」

西遊記之布曼雙城遊—行咇篇

另外一項室內活動，相信大家都會估到，冇錯！就係Shopping行街！由布吉o既Robinson，到曼谷o既Big C、Siam Center、Central、札布札等大大小小商塲市集，都留下咗我哋o既腳毛同血汗(錢)！

「行街」—絕對not my cup of tea！實際上，我似「行咇」多d！試想像：一名中國籍男子，一眼關七、耳聽八方、一手按著槍袋(係錢袋先啱)，一幅戒備狀態，好像隨時會有甚麼事情發生的樣子！有d似行緊咇o既警察，又有d似保鑣！

真係佩服那些女士們，佢哋有用不盡o既腳骨力，彷彿行街行一整日都未夠；佢哋o既目光係遠大o既，好像相信前面的鋪頭永遠都擺放了她們心愛o既貨品一樣！

行咗一日，當我開始有點抱怨，心想：「還要行幾耐？」時，望望身邊……可幸今次係「行双咇」！！

西遊記之布曼雙城遊—剝皮拆骨篇

返到o黎香港，有人問我：「做咩去咗泰國成個禮拜，你都好似冇咩晒黑到？係咪用咗甚麼SK-IV美白精華霜，定係FANCAL果d『要白就要激白』o既東西？」

我笑著回答：「我哋都冇咩同陽光玩遊戲，大部份活動都係室內進行！」

其中一些室內活動就係泰式按摩同埋SPA！

我哋差不多每日都會安排一次泰式按摩或SPA o既時段，甚至我哋臨走果日，都去咗按摩！

講真，按摩又真係幾舒服，特別係行完街，shop完ping之後，我往往做到一半就已經瞓著咗！而且價錢都算okay (酒店內或名店內做除外)，二百銖按一個鐘，兌返港紙即卅、四十蚊左右！算經濟吧？

不過，按摩哩家嘢都幾講手勢同功力，幫我做果d師傅都幾好，但係我同行果d團友，就話好參差，一d就唔夠力，一d就唔到位！

如果有人問我會唔會按上癮，返到香港都要去按摩呢？應該唔會啩！不過初初返到o黎，我發覺自己肋旁有d隱隱作痛，唔知係咪d師傅內功深厚，不經意地震傷咗我d五臟六腑呢？

西遊記之布曼雙城遊—飲食男女篇

開餐前，飲番杯特飲，醒醒胃先！

刺身做頭盤

壽司定食做主菜

唔夠喉！叫多碟！

唔少得布吉海鮮—龍蝦

(影咗好少飲食相，唔係因為食得少，而係因為掛住食，唔記得影…)

今次布曼之旅，以振興經濟為旗號，而飲飲食食當然係其中o既主力！

早在旅行籌劃時，一些中點目標已被我們鎖定，例如甚麼食到嘔buffet、五星級food court、巴東海鮮、平靚正骨排…雖然我o地係旅程當中作過一些調整，但大部分預定目標，我哋都掃過！

係泰國食嘢真係幾經濟(酒店內的食店除外)，我哋叫到成枱都係食物，仲食到差不多嘔，計返港紙都係每人四、五十蚊左右，真係扺！

再者，旅行其間，甚麼禁食、on-diet…都好似忘記得一乾二淨。一時「聞」到街邊串燒「香噴噴」就去「吉」兩串；另一時行到coffee shop、雪糕店，又走入去坐下、食下嘢！差不多奉行兩個鐘一小餐、四個鐘一大餐o既規矩，其進餐o既密度比初生baby三個鐘飲一次奶奶仲要密(只不過我哋已經戒咗夜奶)！

一字記之曰：「飽！」

接近旅途o既尾聲，係曼谷o既酒店房間內，我發現咗一樣唔係好想見o既嘢—浴室磅！即本試下企上去…

「有冇攪錯!!!!個磅一定係壞咗…」

西遊記之布曼雙城遊—住宿篇

我o地係布吉住宿o既地方—客廳

睡房

廚房

Laguna Resort地圖

Laguna Resort o既湖光山色

another view

酒店中的白色禮堂

今次我o地入住布吉o既Laguna Resort。此Resort是由多間酒店組織而成，此地前身是一個礦場，後被發展成一處充滿泰國傳統建築特色o既酒店區(今年港姐都去果到拍外景！)。之前南亞海嘯也摧毀了部分o既房屋，我o地今次都見到有些地區需要重建。

我們入住的房間，是一個apartment — 即是有一間有起居室連兩間雙人房。房內設備都尚算齊備，連DVD機都有提供(話說有人原本想帶埋大長今上機，打算在酒店內勁「煲」，奈何那套大長今是DVD格式，而又沒有預期酒店設有DVD機，於是…所以…)

我o地雖然係Laguna住o左四晚，但係我o地都好像未好好享用酒店提供o既設施，如果下次有機會再去，我估可以住足一個星期，好好咁充下電！

提起「電」，唯一美中不足o既係電力供應問題，我o地住o左四晚，其中三晚試過短暫停電。雖然停電時間不算長，但都造成一定的滋擾。不知這是否與之前海嘯有關呢？

西遊記之布曼雙城遊—序篇

目的地：布吉、曼谷
日期：19 - 25 / 7
旅遊形式：自由行
團友：譚氏夫婦 & 西門夫婦
旅遊目的：視察海嘯災情、振興泰國經濟

休假

東主休假

停台七天

事無大小

記得留言

一週過後

復播之時

不論多少

定必回覆

@廿三樓o既水底世界

飄移

昨天同兩個團友仔睇咗「頭文字D」(InitialD)。套戲唔講得上非常好睇，不過勝在節奏明快，同埋好多攪笑對白。

「好簡單o既o者，即係飄移咁，點飄呀？一入彎，拉一拉手掣，架車「BEL－BEL」咁啦，咁又點呀，型囉！」

「飲奶好呀,有咩好呀又高鈣,又有蛋白質，最緊要係咩呀?明目呀ma！車手最緊要係咩呀?對眼」

除咗笑位外，都有一兩句語重心長，例如：每個人都有一個屬於佢o既世界…

睇完戲，娘子join埋我哋食飯，再跟住一齊返團契。今次週會係戶外週，去傳道人屋企。臨出發前，成班團友仔去咗東涌一個「超級廣場」買嘢(無錯係廣場唔係市場，因為真係超大)。買完嘢，就攞住一袋二袋咁，準備搭車去傳道人屋企。

行吓行吓，好似有d嘢唔對路…去到巴士站準備上車時，幣！點解唔見咗娘子o既？唔通佢學識「飄移」？行行吓，唔見咗！跟住梗係立刻返轉頭搵啦！大家可能唔知？留底老婆唔理，自己走咗去，知唔知係咩呀？…係大罪！

oh！冇囉！起咗火囉！大家唔使理我o架啦，繼續玩得開心d啦！我唔去得啦，因為趕住返去救火…

~~~~~~~~~~~~~~~~~~~~~~~~~~
今朝崇拜後，我俾班團友仔圍住，佢哋好緊張我呀，又關心我、又慰問我！

大家放心吧！我冇事呀！希望冇嚇親大家啦！同埋我感受到大家對我o既愛護呀！多謝晒！

放榜日

今日係一年一度o既高考(AL)放榜日。

每年哩段時候，我都好像多咗份part-time，就係不斷從電話、網上等渠道中，接收應考團友仔的最新消息，今年亦不例外！

昨晚參加咗佢哋放榜前o既祈禱會。千姐和一班弟兄姊妹預備咗一餐豐富o既美食，又邀請咗一班「過來人」，希望無論以有形還是無形的方式來支持我哋o既團友仔。雖然出席o既放榜團友不多，但是你哋係有福(口福同埋心靈上的滿足)o既一群！

考試係咁o架啦！梗係有人得意，有人失意！不過無論點都好，一次半次的成敗得失，絕不能用以評價一生的成就。就算起步慢都唔代表最後o既成績會差過人，況且現在是「跑馬拉松」，所要求的是韌力、毅力！

加油吧！團友們！前面仲有很多精彩嘢等梗大家！

救火 (續)

似乎場火仲未受到控制！
唔通真係要毀掉一齊，才會熄滅？
無奈！！

暢談火車軌

今晚我同一班團契組仔去咗食壽司自助餐。都算幾齊人(有d平時團契較少出席o既，今次都有到)！

好好笑，有d人竟然唔記得咗人哋叫咩名，仲有d人唔知道人哋原來都係讀F.7！我估大家都要檢討下自己啦！

有見及此，我哋就要每個人都介紹一下自己，同講下自己近況！點知哩班小鬼頭，講下講下，講咗自己d感情生活！佢哋學效耶穌基督o既表達方法—講比喻！佢哋用火車軌表示有拖拍！如是者，以下一堆名詞就咁出現(我不便在此一一解釋，大家意會一下啦！)：無軌車、寬軌、子彈火車、地下鐵路、高架鐵路，轉軌、雙軌鐵路、出軌、暫停服務、維修中…

點到好啦！祝各位路路暢通，永無出軌啦！

西門町 in Bloggerland

Saturday, July 30, 2005

友得Camp

Tuesday, July 26, 2005

西遊記之布曼雙城遊—完結篇

西遊記之布曼雙城遊—「我杯茶」篇

西遊記之布曼雙城遊—行咇篇

西遊記之布曼雙城遊—剝皮拆骨篇

西遊記之布曼雙城遊—飲食男女篇

西遊記之布曼雙城遊—住宿篇

西遊記之布曼雙城遊—序篇

Monday, July 18, 2005

休假

Thursday, July 14, 2005

@廿三樓o既水底世界

Sunday, July 10, 2005

飄移

Friday, July 08, 2005

放榜日

Thursday, July 07, 2005

救火 (續)

Monday, July 04, 2005

暢談火車軌

Link

Previous Posts

Archives