詩篇一一九 (通俗版)
唔知大家讀聖經有咩感受呢？當然神嘅話語係好精煉，特別當我哋面對一D際遇嘅時候，上帝嘅說話好多時候都好「到」！
不過，我自己嘅感覺係：聖經嘅用字好似同我有D距離，少咗份親切感，往往讀經還讀經，生活歸生活！
今個星期二晚上堂嘅時候，老師讀咗D經文俾我哋聽，係詩篇一一九 (係最長嘅詩篇，共有176節！)，但今次好唔同，好有時代感，又好有親切感！我節錄D俾大家讀吓，試吓體會一吓，我建議大家攞住你本聖經左右對照一吓：
9-11節
後生仔，後生女點樣先至能夠行得正、企得正？
就係要聽你支笛囉。
我呢？就跟梗你㗎喇，
求你照住我，等我唔駛走歪咗路。
你講啲嘢，我直情係聽到入心入肺，
唔駛一個唔覺意得罪你。
9-16節
一個年青人點會過純潔無瑕嘅生活呢？
除非佢肯熟讀你嗰本「天書」做人。
我係死心塌地咁跟住你咖喇，
咪畀我睇唔到你豎起嘅路牌。
我已經將你應允過嘅嘢放咗落心靈錢錢罌度，
所以我唔會叫自己周身冇「蚊」。
天上嘅老豆呀！教我用你嘅方法生活得醒啲啦。
我一於將你講啲嘢，當正係自己要講嘅嘢。
我恨不得你話我知點做人，仲好過我周圍去執金we銀。
我囉囉攣咁思想你嘅智慧，又眼定定”kap”住你點樣做。
我鍾意你對我講嘅指示，連一隻字仔都唔敢忘記。
127節
神啊!我喜歡你的說話，就好似喜歡銀紙、靚屋、靚車、名牌衫，新款手機一樣。
157-158節 （特別為一位由內地來港、獨居、信主不久的工友改寫／演繹的）
佢地真係冇個好人，話我響上面落嚟嘅，唔係笑我講嘢音唔正，就係塞哂啲工夫畀我做，做到我索哂氣，好彩我信咗耶穌，心幾嬲，幾唔順，都唔同佢地擘面，知道咁係唔神心。我份人最睇唔過眼嘅係果啲當你冇到嘅人，佢地我一見到就想調頭走。
係咪好正呢！我都好希望自己可以讀經讀得咁通透，然後用另一個表達方法，將佢嘅神髓演繹出來！
posted by 西門子 @ Thursday, September 16, 2004
<< Home