團長+領隊：我老豆
團員：我老媽子、我老婆&我自己
旅行日期：22/8(日) — 25/8(三)
Day One (22/8)
行程：香港—台北中正機場—台北第一大飯店—淡水—士林夜市—台北第一大飯店
天氣：陽光普照、炎熱
個人警戒級別：**** (5* 為最高級別)
遊記：
我和老婆搭10點幾機出發往台北，因團長及團長夫人於凌晨時分已率先出發，所以我o地相約係酒店匯合。又因第一次帶老婆以自由行方式出國，所以特別覺得緊張，隨時保持戒備狀態！…安全抵達&與團長匯合！
之後乘捷運(=香港o既MTR)去淡水。嘩！條街勁多人，街上又有唔同o既表演，十足十好似假日o既赤柱咁！我o地未食午餐，街上又有好多賣小食o既鋪頭，一於就…「掃街」！真係好多人呀，好似行花市咁，一方面要睇下團友們有冇走失，另一方面又要小心財物，所以仍然保持高度戒備！
之後，我o地去到一間coffee shop！wow！佈置得好有氣氛，有心心氣球，又有洋燭…唔怪之得咁多人啦！原來哩日係台灣o既情人節—七姐旦！
夜晚，去士林再「掃街」…不過今次冇深入腹地，因為真係好多好多人，最後都係返酒店休息！
我開始明白為何我不太喜歡去旅行！因為人們去旅行大多為了休息、放鬆自己…但係我旅行時常常都保持戒備狀態，顧慮甚多，咁様去旅行法，點會覺得放鬆？點會休息到？
哩晚，我祈禱，求神讓我可以輕輕鬆鬆咁放假休息！
Day Two (23/8)
行程：台北第一大飯店—九份—金瓜石—野柳—深坑—台北市內觀光—101—台北第一大飯店
天氣：局部地區性狂風雷暴 (阿艾利哥is coming!!)
個人警戒級別：** (5* 為最高級別)
遊記：
原本只係一程過搭的士去九份玩一日，點知個的士司機遊說我o地「包」車一日，由佢帶我o地去玩！自己打打個算盤，認為都係值得o既！(後尾回想番：上帝真係聽禱告，並且有合時o既預備，因為當天天氣極不穩定，無la la 會突然落雨，如果無包車，我o地一定會好狼狽！我就更加輕鬆唔到！)
去到九份！yeah！真係一個優雅o既地方，佢o地d屋都係依山以建，又幾古色古香！慢慢行，睇下東，看下西，攰就隨便找間茶棚坐底休息下、食下d小食！good! good! good！我仲俾一d宛然o既笛聲吸引住！好好聽呀！原來係一d叫陶笛o既樂器(如果你有玩過「薩以達傳說」，就知個樣係點！)我仲買咗個返屋企tim！希望有機會學成歸來，為主吹笛！跟住我o地找咗間真係依山以建o既餐廳食飯、飲珍珠奶茶！嘩！坐係個balcony到，d微風真係吹得我好舒服。如果時間再長d，可以再坐耐d，睇下書，飲下o野！wow！實在無得彈！(個到有d民宿可以租，如果下次去真係可以考慮係九份住多一、兩日，優哉柔哉一下！)
跟住去其他地方，都係觀下光，食下o野咁，無mud特別！不過，我覺得最特別o既係，就係團長(我老豆)，不斷咁同我o地影相！我忽然間覺得，好似返番去十幾廿年前咁，老豆、老媽帶我o地四兄妹行山旅行，仲週圍擺pose影相咁！我估佢o地都好開心！同會好珍惜哩段時間！
(待續…)
| 
<< Home