游水
| 踏入八月份，我每星期都有一兩次去泳池游水，其實我都係初哥！學咗幾年都未掌握到換氣o既秘訣，往往游幾步後，就要企起到，透順條氣再游！！不過今個星期再游o既時候，好似有d突破！Yeah！開始掌握到少少換氣o既秘訣，係對手攰D！
我估學識游水都算係一個少少o既achievement掛，而且都幾意味深長！ 從前，有個小孩子，佢外表cutie，讀書又精靈，所以無論係邊到，都深得親友師長們o既寵愛。 不過，小孩子有一個秘密！一個只有佢o既屋企人先知o既秘密！係佢身體上天生有一個地方，係異於常人！哩個秘密令佢唔敢去游水！因為當佢去游水o既時候，其他人就會立刻發現哩個秘密！佢擔心俾人話佢係怪人，所以一於唔學游水，唔去泳池！ 有一次，小孩子問媽咪，究竟幾時先會好番？好似其他小朋友咁！佢媽咪話，只要食多d嘢，大個咗，就會好番…佢好開心咁照做，不過，哩段說話，從來未兌現過！ 又有一次，學校旅行，先生話要帶同學去游水！幣！今次點算？小孩子硬住頭皮，著住衫褲鞋襪咁落水！先生問佢點解？佢支支吾吾咁找個藉口了事！ 後來，哩個小孩子認識咗耶穌，並且同耶穌做咗好朋友。小孩子知道哩位好朋友好有本事，能夠創造一切，叫「冇」變成「有」。所以，小孩子就求哩位好朋友幫助，希望可以令佢好似其他小朋友咁！唔會再驚俾其他人取笑！不過佢哩位好朋友冇出到聲…小孩子o既秘密依然係秘密… 又過咗一陣，小孩子係教會到，認識咗好多小朋友，而且一齊玩得好開心！不過，小孩子都係驚呀，所以佢從來冇向哩班小朋友透露過佢o既秘密！ 但係哩班小朋友都係好精靈，當佢地同小孩子玩o既時候，察覺到小孩子身體上有一個地方，係異於常人！有部份小朋友靜悄悄咁問小孩子哩個秘密。小孩子本來想編個大話出來，但佢又應承過耶穌哩個好朋友，以後唔再講大話…幾經掙扎，佢硬住頭皮咁，同哩班小朋友透露佢o既秘密！佢心想：「冇啦！哩班小朋友一定會笑我，佢o地一定會當我係怪物，以後都唔同我玩！」點知？冇喎！哩班小朋友不單冇取笑小孩子，仲更加當佢係好朋友，願意保護佢！ 小孩子好開心，佢仲覺得好輕鬆，從來都未試過咁輕鬆，好似一塊千斤重o既石頭從佢身上卸下！ 其中一個小朋友問：「我o地咁開心，不如一齊去水上樂園玩下！」 小孩子話：「不過，我唔識游水喎！」 小朋友回答：「等我教你啦！」 … … … 宜家，小孩子好開心咁係泳池到游水，佢雖然游得一D都唔叻，不過佢宜家做緊一樣，從前完全冇想過o既事！佢o既身體一D都冇變化，只不過佢o既心改變咗，從前o既秘密已經不再係秘密啦，佢已經唔再怕俾人取笑！ 小孩子再回想佢向耶穌哩個好朋友o既請求，竟然已經係不知不覺下成全咗！ God will make a way, where there seems to be no way! He works in way we cannot see! He will make a way for me! |
posted by 西門子 @ Wednesday, August 18, 2004
<< Home