厭盆症
係一醫務所…西門子：醫生醫生，唔知點解？最近每當我見到洗面盆狀物體，我個心就有一股肥膩、翳悶o既感覺？
醫生：係？有d咁o既事？你幾時開始有咁o既症狀？
西門子：我諗呀…大約過新年前一兩日啦！不過開頭無咁嚴重，但近日就越來越犀利囉！
醫生：係？咁你哩排飲食有冇咩特別？
西門子：唔…都係d過年食品啦。呀！唔知關唔關事呢？我由年廿七到今日年初五，隔日食盆菜囉，計計埋埋今個新年我食咗四盆啦！
醫生：哦！原來係咁！你哩個係一種心理病，叫「厭盆症」，病人通常係短期內，食咗大量盆菜，就會有好似你咁o既症狀。
西門子：吓！醫生，咁我嚴唔嚴重呀？有冇得醫呀？
醫生：你揭起件衫俾我睇睇……(檢查中)……唔……你未算好嚴重，不過你個肚已經開始出現「盆」狀，所以病情都唔可以輕忽！如果你再唔注意的話，一旦泛「腩」，甚至發展成為「瘋肚」病，後果就不堪設想！我諗你都係少食為妙！
係西門家…
西門子：老婆，我返o黎啦！今晚餐飯有咩餸？
西門太：你唔記得咗啦！琴晚個盆菜都未食晒，今晚咪食埋去囉！呀話時話，你記得呵？聽日我哋約咗上強生同細美屋企喎，佢哋剛剛打電話o黎，話已經訂咗個特大盆菜來招呼我哋……老公…老公…
西門子已不支倒地……
posted by 西門子 @ Thursday, February 02, 2006
<< Home